Pjesë nga fjala ime për Fitër Bajram.
Të nderuar dhe të shtrenjtë besimtarë dhe besimtare.
Fjala ime modeste, nëpërmjet këtij zgjatuesi zëri po aq modest, shpalos dobësinë time dhe dashamirësinë e popullit tonë besimtar, për të reflektuar në këtë ditë lumturie e gëzimi, por edhe për të ndjerë përgjegjësinë tonë si qytetarë, përballë njerëzve dhe mbi të gjitha, përballë Zotit.
Le të kthejmë vëmendjen te familja dhe fëmijët tanë si shpresa e së nesërmes. Le të angazhohemi me përkushtim, që krahas edukimit shkencor, të mbjellim edhe edukimin fetar e kulturor. Të nxisim zhvillimin e shkencës, por pa harruar zhvillimin e moralit, edukatës dhe ndërgjegjes njerëzore.
Le të vlerësojmë gruan, jo thjesht si një gjini, por si një vlerë të përkushtuar, përmes së cilës Zoti e ka zbukuruar dhe shtuar jetën njerëzore me të.
Le të kuptojmë rolin e burrit dhe të babait, që nëpërmjet vlerave që i ka dhuruar Zoti, të ngrihet në nivelin e përgjegjësisë që i takon. Të jemi të besueshëm për familjet tona, të urtë, të ditur dhe të matur në rrugën e jetës.
Gjyshërit dhe gjyshet janë urat që lidhin brezat, vendi ku bisedat dhe koha marrin urtësinë e përvojës dhe lutjet e pakthyeshme të Zotit për të rinjtë tanë.
Të nderuar vëllezër dhe motra,
Në këto ditë të bekuara ftoj për reflektim dhe vetëdije. Kjo thirrje nuk është aq për masat e popullit, sa për elitën e vendit.
Elitat e një vendi janë katër:
1. Elita fetare – Duhet të ngrihet në nivelin e asaj që kërkon Zoti dhe Profeti i Tij, larg manipulimeve, interesave personale apo tundimeve që mund të zbehin të vërtetën dhe të shkelin të drejtat e njerëzve.
2. Elita intelektuale – Duhet të udhëheqë shoqërinë në ndarjen e së mirës nga e keqja, të së drejtës nga e gabuara. Kur mësuesit, profesorët dhe intelektualët humbasin rrugën, populli ka humbur prej kohësh. Kur mendjet ndërtojnë mbi korrupsion, e ardhmja e kombit është e errët.
3. Elita ekonomike – Duhet të kuptojë përgjegjësinë që ka para Zotit dhe popullit, duke ndihmuar në bursa studimi, zhvillim ekonomik dhe hapje të vendeve të punës, pa keqpërdorur nevojat e njerëzve.
4. Elita politike – Duhet të kuptojë amanetin e popullit. Taksa nuk është gjë tjetër veçse djersa dhe mundi i qytetarëve. Vjedhja dhe korrupsioni janë mëkate të rënda, ndërsa përdorimi i drejtë i pushtetit sjell mirësi dhe bekim.
Në përfundim, i lutem Zotit për udhëzim, falje dhe bekim.
Zoti bekoftë familjet tona! Zoti bekoftë prindin e mirë! Zoti bekoftë intelektualin e drejtë! Zoti bekoftë të pasurin fisnik! Zoti bekoftë klerikun e sinqertë! Zoti bekoftë politikanin e drejtë!
Amin!
Hoxhë Vladimir Kera
