Irani ka sinjalizuar se është i gatshëm të mbrojë vendin, ndërsa Shtetet e Bashkuara vazhdojnë kërcënimet për një sulm ushtarak dhe forca detare amerikane po pozicionohen pranë ujërave iraniane.
Ministri i Jashtëm iranian, Abbas Araghchi, pritet të zhvillojë të premten bisedime të nivelit të lartë në Turqi. Sipas zëdhënësit të MPJ-së, Esmaeil Baghaei, Teherani synon forcimin e vazhdueshëm të marrëdhënieve me fqinjët, në bazë të interesave të përbashkëta.
Vizita vjen në kuadër të përpjekjeve diplomatike rajonale për të shmangur një konflikt të ri, ndërsa Presidenti amerikan Donald Trump ka deklaruar se një “armatë” amerikane, e udhëhequr nga aeroplanmbajtësja USS Abraham Lincoln, po lëviz pranë Iranit.
Zyrtarë të lartë iranianë kanë theksuar se përparësi ka mbrojtja, jo negociatat. “Prioriteti i Teheranit nuk është negociimi me SHBA-në, por gatishmëria 200 për qind për të mbrojtur vendin,” ka deklaruar Kazem Gharibabadi, anëtar i ekipit negociator iranian.
Irani ka intensifikuar gjithashtu demonstrimin e fuqisë ushtarake. Ushtria njoftoi se 1.000 dronë të rinj “strategjikë” i janë bashkuar forcave të saj, përfshirë dronë sulmues, zbulues dhe me kapacitete për luftë kibernetike.
Në të njëjtën kohë, në Iran ka shqetësim mes qytetarëve për pasojat e mundshme të një lufte të re. Ndërsa mbështetësit e qeverisë shprehen sfidues, shumë civilë shprehin frikë nga shkatërrimi dhe humbjet njerëzore.
Autoritetet iraniane kanë nisur masa për përgatitjen civile. Presidenti Masoud Pezeshkian u ka deleguar kompetenca guvernatorëve të provincave kufitare për të siguruar furnizime bazë, ndërsa autoritetet e Teheranit kanë paralajmëruar ndërtimin e strehimoreve nëntokësore, një projekt që pritet të zgjasë me vite.
Një konflikt i ri pritet gjithashtu të sjellë kufizime të reja të komunikimit, përfshirë ndërprerje të internetit dhe rrjeteve mobile, siç ka ndodhur më parë gjatë protestave dhe përplasjeve të fundit në vend. /mesazhi
