Zëdhënësi i Kremlinit, Dmitry Peskov, ka deklaruar se për shkak se nuk ka sinjale nga Ukraina për bisedimet e paqes, Rusia vazhdon “operacionin special ushtarak”, transmeton Anadolu.
Peskov përmendi një dekret të nënshkruar vitin e kaluar nga presidenti i Ukrainës, Volodymyr Zelenskyy, që ndalon Kievin të zhvillojë bisedime të paqes me Rusinë për sa kohë që Vladimir Putin shërben si president i Rusisë.
“Deri më tani, për të qenë i sinqertë, ndoshta askush nuk mund të japë ndonjë sinjal nga pala ukrainase, derisa ne vazhdojmë nga pamundësia ‘de jure’ që pala ukrainase të negociojë”, tha Peskov në një konferencë për media në Moskë.
Ai theksoi se “realitetet e reja” po ashtu duhet të merren parasysh dhe se duhet të arrihen qëllimet e “operacionit special ushtarak”, denazifikimi dhe çmilitarizimi.
“Sigurisht, me një gjendje të favorshme të çështjeve të shtetit dhe me qëndrimin e duhur të regjimit ukrainas, kjo mund të zgjidhet në tryezën e bisedimeve. Por në këtë rast gjëja kryesore është të arrijmë qëllimet tona, ky është prioriteti ynë absolut”, tha Peskov.
Në lidhje me udhëtimin në Azinë Qendrore të sekretarit amerikan të shtetit, Antony Blinken, Peskov tha se “kemi marrëdhëniet tona dypalëshe me vendet e Azisë Qendrore dhe kemi format tona të ndërveprimit”.
“Ne jemi të bashkuar nga proceset integruese të Unionit Ekonomik Euroaziatik, që është ajo ku ne fokusohemi, ajo që na intereson dhe ajo që ne e konsiderojmë prioritetin tonë kryesor të politikës së jashtme”, tha Peskov.
