Inxhinieria biologjike e jashtëzakonshme që u lejon atyre të ngrihen dhe të ecin me shpejtësi
Në botën e egër, mbijetesa kërkon lëvizje të jashtëzakonshme, por asnjë nuk është aq mbresëlënëse sa aftësia e gjarpërinjve për t’u ngritur vertikalisht në ajër.
Pa pasur asnjë kockë apo gjymtyrë për t’u mbështetur, këto kafshë arrijnë të qëndrojnë drejt si shtylla të gjalla.
Një studim i fundit në Royal Society Publishing, ka analizuar se si muskujt e tyre punojnë në sinkron për të sfiduar gravitetin, duke hapur rrugën edhe për teknologji të reja në robotikë.
Shumë lloje gjarpërinjsh janë në gjendje të ngrihen nga toka, shpesh si një paraprirje për sulm, por gjarpërinjtë arborealë janë specializuar në këtë lëvizje në dukje të panatyrshme.
Ata duhet të qëndrojnë drejt për të lëvizur nga dega në degë, duke mbajtur nganjëherë deri në 70 për qind të trupit të tyre vertikalisht.
Ekipi kërkimor, i përbërë nga specialistë të anatomisë, matematikës dhe fizikës, u fokusua në dy specie specifike: gjarpri i pemës kafe (Boiga irregularis) dhe pitoni ametist (Simalia amethistina).
Studiuesit ndërtuan në laborator platforma që imitonin degët e pemëve dhe përdorën kamera me definicion ultra të lartë për të vëzhguar çdo lëvizje muskulore.
Zbulimi ishte befasues, pasi përpara këtij studimi mendohej se mënyra më efikase për t’u ngritur ishte ngurtësimi i të gjithë trupit.
Në realitet, gjarpërinjtë e përqendrojnë ngurtësinë e tyre vetëm në një rajon specifik të trupit që shërben si bazë për ngritje, ku e gjithë forca muskulore përqendrohet në atë pjesë të vetme për të mbajtur pjesën tjetër të trupit drejt.
Kjo kërkon jo vetëm forcë, por edhe një proprioceptim të konsiderueshëm, domethënë aftësinë për të perceptuar pozicionin e dikujt në hapësirë edhe pa përdorimin e shikimit, fakt që vërtetohet nga aftësia e tyre për t’u ngritur edhe në errësirë të plotë.
Ky studim nuk zbulon vetëm një sekret biologjik, por sipas autorëve, ai mund të ketë edhe zbatime praktike në krijimin e robotëve që NASA po ndërton për eksplorimin e mëtejshëm të Hënës. /tesheshi
