Trepça ’89 ka fituar 2-1 ndaj Prishtinës në ndeshjen e fundit të sezonit 2022/23 në Albi Mall Superligën e Kosovës, mirëpo nuk ka arritur të qëndrojë nç elitën e futbollit tonë, pasi Ferizaj ia doli të mposhte Dukagjinin me rezultat 2-1.
Kryeqytetasit e nisën ndeshjen mirë mirë, duke krijuar disa shanse shënimi, mirëpo u mungoi konkretizimi.
Trepça ’89 filloi të këndellej, mirëpo pësuan golin nga mysafirët.
Ishte Leotrim Kryeziu, ai që shënoi për 1-0 në minutën e 39-të të takimit me anë të penalltisë.
Në pjesën e dytë, ishte një dramë e vërtetë, pasi Trepça ’89 shënoi dy gola.
Ishte minuta e 85-të e takimit, kur mitrovicasit shënuan nëpërmjet Nimanit, për të ndezur bashkëlojtarët e tij dhe për të shkuar për golin e epërsisë.
Skuadra nga Mitrovica ia doli të përmbyste rezultatin, duke shënuar me anë të Fazliut në minutën e 90+6-të, por që në fund doli të ishte një fitore e pavlefshme në luftën për mbijetesë.
Vlen të ceket se Prishtina luan edhe në finalen e Kupës së Kosovës me Gjilanin, ndeshje kjo që luhet më 5 qershor dhe mund të sigurojë një vend në Evropë, por që u duhet licencimi nga FFK-ja.
Prishtina e mbyll sezonin në vendin e pestë me 48 pikë, ndërsa Trepça ’89 që ra në Ligën e Parë, ka arkëtuar 40 pikë.
