Vetëm rreth 180 palestinezë kanë arritur të largohen nga Rripi i Gazës përmes pikës kufitare Rafah me Egjiptin, që nga rihapja e pjesshme e saj një javë më parë, sipas burimeve zyrtare lokale.
Pika kufitare Rafah, e vetmja dalje e Gazës drejt botës së jashtme që nuk kalon përmes Izraelit, u rihap për lëvizjen e personave më 2 shkurt, pas gati dy vitesh mbylljeje, që nga marrja e kontrollit nga forcat izraelite gjatë luftës shkatërrimtare në Gaza.
Sipas kreut të Zyrës Qeveritare të Medias në Gaza, Ismail al-Thawabteh, nga e hëna deri të enjten (2–5 shkurt) vetëm 135 persona kaluan drejt Egjiptit, kryesisht pacientë dhe shoqëruesit e tyre. Ai theksoi se lëvizja ishte e kufizuar në mënyrë të ashpër dhe se pika kufitare mbeti e mbyllur edhe të premten dhe të shtunën.
Të dielën, edhe 44 persona të tjerë u larguan nga Gaza përmes Rafahut, përfshirë 19 pacientë, sipas drejtorit të Spitalit Al-Shifa, Mohammed Abu Salmiya. Me këtë, numri i përgjithshëm i personave që kanë dalë nga Gaza ka arritur në rreth 179–180.
Ndërkohë, lëvizje ka pasur edhe në drejtim të kundërt. Rreth 88 persona janë kthyer në Gaza nga Egjipti gjatë së njëjtës periudhë, duke u ribashkuar me familjet e tyre.
Rihapja e pikës Rafah u lejua nga Izraeli pas presionit ndërkombëtar, por kalimi aktualisht u është lejuar vetëm pacientëve dhe familjarëve shoqërues. Organizatat humanitare theksojnë se mijëra të sëmurë dhe të plagosur në Gaza kanë nevojë urgjente për trajtim mjekësor jashtë territorit, përfshirë mijëra fëmijë. /mesazhi
