Një delegacion i nivelit të lartë vizitoi kampet e refugjatëve Rohinga në Cox’s Bazar të Bangladeshit në ditën e parë të Ramazanit, duke përcjellë mesazhin se komuniteti ndërkombëtar nuk duhet ta harrojë krizën humanitare.
Mes vizitorëve ishin futbollisti gjerman, kampion bote, Mesut Özil dhe Bilal Erdoğan, djali i presidentit turk Recep Tayyip Erdoğan. Ata vizituan kampet në zonën e Ukhiyas dhe ndanë iftarin me familje Rohinga.
Delegacioni u organizua me mbështetjen e Imam Malik Mujahid, kryetar i organizatës Justice for All dhe drejtues i Burma Task Force, një koalicion i 38 organizatave muslimane i themeluar në vitin 2012 në SHBA.
Theksi te arsimi
Gjatë vizitës në Kampin 9 në Ukhiya, delegacioni inspektoi qendrat mësimore, shërbimet shëndetësore dhe operacionet humanitare. Rohingat e rinj u mblodhën rreth Özil, duke kërkuar fotografi me ish-yllin e Arsenal dhe Real Madridit.
Bilal Erdoğan e cilësoi krizën Rohinga si një nga emergjencat humanitare më të zgjatura në botën muslimane dhe bëri thirrje për ndarje më të madhe të barrës nga komuniteti ndërkombëtar.
Ai theksoi veçanërisht rëndësinë e arsimit, duke nënvizuar se shumë fëmijë Rohinga janë privuar nga shkollimi për dekada, fillimisht në shtetin Rakhine të Myanmar (i njohur edhe si Burma), dhe tani në mërgim.
Sipas organizatorëve, mbyllja e 6,400 shkollave nga UNICEF, për shkak të ndërprerjes së fondeve nga USAID, ka lënë rreth 500 mijë fëmijë Rohinga jashtë sistemit arsimor.
Burma Task Force ka kërkuar që Turqia dhe vendet e tjera muslimane të marrin përsipër funksionimin e 100 shkollave secila për të mbuluar boshllëkun e krijuar.
Kriza e zgjatur
Rohingat, pakicë muslimane nga shteti Rakhine në Myanmar, janë përballur me dekada diskriminimi. Ligji i shtetësisë i vitit 1982 i la shumicën e tyre pa shtetësi. Në vitin 2017, një operacion ushtarak i përgjakshëm detyroi mbi 700 mijë persona të largohen drejt Bangladeshit.
Hetues ndërkombëtarë e kanë cilësuar fushatën si spastrim etnik, ndërsa proceset në Gjykatën Ndërkombëtare të Drejtësisë janë ende në vazhdim.
Sot, mbi gjysma e popullsisë Rohinga në Cox’s Bazar është nën moshën 18 vjeç. Kombet e Bashkuara kanë paralajmëruar se racionet ushqimore janë reduktuar për shkak të mungesës së fondeve globale.
Vizita e figurave të njohura si Özil dhe Bilal Erdoğan i dha një dimension ndërkombëtar thirrjes për ndihmë. Për familjet Rohinga, ajo solli vëmendje dhe solidaritet simbolik, por sfida mbetet e madhe: pas gati shtatë vitesh, ata vazhdojnë të jetojnë në pasiguri, pa shtetësi dhe të varur nga ndihmat.
Organizatorët theksuan se qëllimi i vizitës nuk ishte vetëm solidariteti gjatë Ramazanit, por rinovimi i angazhimit global për të mos lejuar që një brez i tërë të rritet pa arsim dhe pa shpresë për të ardhmen. /mesazhi
