Shtatë vende muslimane, përfshirë Turqinë, kanë dënuar “fuqishëm” shkeljet e përsëritura të armëpushimit nga Izraeli në Gaza, të cilat kanë shkaktuar vdekjen dhe plagosjen e mbi një mijë palestinezëve, transmeton Anadolu.
“Këto veprime rrezikojnë përshkallëzimin e tensioneve dhe minojnë përpjekjet që synojnë konsolidimin e qetësisë dhe rikthimin e stabilitetit, në një kohë kur palët rajonale dhe ndërkombëtare po punojnë së bashku për të avancuar fazën e dytë të planit të paqes të presidentit Donald Trump dhe për të zbatuar Rezolutën 2803 të Këshillit të Sigurimit të OKB-së”, thuhet në deklaratën e përbashkët të ministrave të jashtëm të Turqisë, Egjiptit, Jordanisë, Indonezisë, Pakistanit, Katarit dhe Arabisë Saudite.
Ministrat thanë se këto shkelje të vazhdueshme i shohin si një kërcënim të drejtpërdrejtë ndaj procesit politik, duke penguar përpjekjet për krijimin e kushteve për kalimin në një fazë më të qëndrueshme në Rripin e Gazës, si në aspektin e sigurisë ashtu edhe në atë humanitar.
Ata gjithashtu bënë thirrje për përkushtim të plotë ndaj suksesit të fazës së dytë të planit të paqes të presidentit Trump për Gazën.
Ministrat u kërkuan të gjitha palëve që të përmbushin përgjegjësitë e tyre gjatë kësaj periudhe dhe të tregojnë përmbajtje, me qëllim ruajtjen e armëpushimit dhe shmangien e veprimeve që mund të ndikojnë negativisht në procesin aktual.
Ata po ashtu u bënë thirrje palëve të krijojnë kushte të favorshme për rimëkëmbje të hershme dhe rindërtim, duke avancuar një paqe të drejtë dhe të përhershme të bazuar në të drejtën e palestinezëve për vetëvendosje dhe shtetësi, në përputhje me të drejtën ndërkombëtare, rezolutat përkatëse të Këshillit të Sigurimit të OKB-së dhe Iniciativën Arabe të Paqes.
Pavarësisht armëpushimit, Izraeli ka vazhduar sulmet, duke vrarë 524 persona dhe duke plagosur 1.360 të tjerë që nga 10 tetori.
