Zëdhënësja e qeverisë iraniane, Fatemeh Mohajerani ka deklaruar Irani nuk synon sulme të reja, por do të përgjigjet “më fuqishëm se më parë” nëse sulmohet sërish, transmeton Anadolu.
“Ne nuk duam të përballemi me sulme të reja, por nëse ndodhin të tilla, sigurisht që do të përgjigjemi më fort se më parë”, tha ajo në një intervistë për agjencinë shtetërore të lajmeve IRNA.
Mohajerani tha se Irani po ndjek njëkohësisht strategji diplomatike dhe mbrojtëse, duke theksuar se të dyja qasjet synojnë mbrojtjen e sovranitetit dhe dinjitetit kombëtar.
Ajo shtoi se forcat mbrojtëse të Iranit janë në gatishmëri të plotë dhe e përshkroi qasjen e vendit si “negocim duke qenë të përgatitur”, duke theksuar gatishmërinë si në frontin diplomatik ashtu edhe në atë ushtarak.
Më tej, ajo gjithashtu shprehu besim në ekipin negociator të Iranit, duke shtuar se ai kombinon përvojën në terren me ekspertizën diplomatike dhe se nuk do të bëjë kompromis mbi interesat kombëtare.
Mohajerani tha se qeveria mbështet plotësisht vendimet dhe rezultatet e ekipit negociator.
Përplasjet në rajon u përshkallëzuan pasi SHBA-ja dhe Izraeli nisën sulme të përbashkëta ndaj Iranit më 28 shkurt. Si përgjigje, Teherani kreu sulme hakmarrëse ndaj Izraelit dhe vendeve të tjera të rajonit që strehojnë asete amerikane.
Pakistani priti raundin e parë të bisedimeve të paqes më 11 prill, pasi ndërmjetësoi një armëpushim dyjavor më 8 prill, i cili pritet të përfundojë nesër. Një raund i dytë negociatash pritet këtë javë, gjithashtu në Islamabad.
