Afrika Lindore po përballet me situatën më të keqe të sigurisë ushqimore në historinë e fundit mes mungesave për shkak të luftës në Ukrainë, thotë drejtori rajonal i Programit Botëror të Ushqimit (WFP).
Mike Dunford ka thënë se tani ka 82 milionë njerëz me uri akute, nga 50 milionë sa ishin vitin e kaluar.
“Lufta në Ukrainë dhe Rusi po përkeqëson atë që tashmë ishte një situatë katastrofike”, thotë ai.
Ai shton se ushqimi duhet të konsiderohet jashtë paketave të sanksioneve që lidhen me konfliktin.
“Ne duhet të sigurojmë që ushqimet nga Ukraina, nga Rusia të jenë të disponueshme. Ne duhet të shohim që plehrat të lëvizin të papenguar nga çdo regjim sanksionesh”, thotë ai, duke shtuar se konflikti ka “një ndikim jashtëzakonisht negativ në të gjithë globin”.
“Popullsitë më të cenueshme, vendet më të cenueshme po tërhiqen në një konflikt, apo në efektet e një konflikti, në të cilin ata nuk kanë asnjë rol”. /koha
