Aktivistja që jeton në Norvegji, Mia Sol Stoelen e cila dogji pasaportën e saj izraelite për të protestuar kundër gjenocidit në Gaza, tha se Izraeli është bërë “një shoqëri e përbërë nga ekstreme”, transmeton Anadolu.
Vajza e një babai izraelit dhe një nëne norvegjeze, Stoelen jetoi në Tel Aviv për shtatë vjet si shtetase e dyfishtë. Ajo tha se gjatë kohës së saj në Izrael fillimisht nuk e shihte situatën si një pushtim dhe “mendonte se ishte sikur të gjithë po jetonim së bashku”.
Por, përfundimisht e kuptoi se ishte “shumë injorante për Bregun Perëndimor dhe Gazën”. Në vitin 2019 ajo shkoi në një turne në Bregun Perëndimor të organizuar nga organizata e shoqërisë civile “Breaking the Silence”.
“Isha mjaft e tronditur nga ajo që pashë”, tha ajo.
– Shteti i aparteidit
Ajo kujtoi masakrën e vitit 1995 të kryer nga kolonisti ekstremist hebre Baruch Goldstein në xhaminë “Ibrahimi” gjatë lutjeve të mëngjesit si dhe krijimin e mëvonshëm të zonave në Hebron që ishin të ndaluara për palestinezët.
“Rruga ‘Shuhada’ është e hapur për të gjithë të huajt dhe izraelitët që të kalojnë, por nëse një palestinez kalon andej, ai qëllohet nga ushtria izraelite. Pra, kjo tregon qartë një aparteid”, tha ajo duke përshkruar rrugën kryesore që të çon në Varrin e Patriarkëve në Hebron.
Stoelen vizitoi Izraelin së fundmi në gusht 2023 dhe vuri në dukje se para 7 tetorit, afërsisht 500 mijë njerëz protestonin kundër qeverisë çdo fundjavë. “Ishim pothuajse në prag të luftës civile dhe të gjithë në median izraelite e thoshin këtë. Të mendosh se ishte rastësi, se edhe nëse do të donin nuk do të mund ta kishin ndaluar, duhet të jesh shumë naiv”, tha Stoelen për sulmet e Hamasit ndaj Izraelit.
– Propaganda shtetërore
Ajo e përshkroi opinionin publik izraelit si të formuar kryesisht nga politikat shtetërore dhe media. “Mendoj se ata kanë rënë viktimë e propagandës shtetërore dhe janë shumë të trushpëlarë nga media e tyre”, shtoi ajo.
Stoelen theksoi trajtimin e popullsisë me origjinë arabe në Izrael.
“Kur ata migruan, ata e vendosën popullsinë me origjinë arabe më afër kufirit në mënyrë që nëse do të ndodhte një infiltrim, ata të vriteshin të parët. Pra, ka shumë padrejtësi racore edhe brenda sektorit hebre”.
Pas vrasjes së ish-kryeministrit izraelit Yitzhak Rabin, i cili fitoi Çmimin Nobel për Paqe së bashku me udhëheqësin palestinez Yasser Arafat, shumë qytetarë të arsimuar dhe intelektualë u larguan nga vendi, të zëvendësuar nga sionistët.
“Kush lëviz atje tani? Sionistët ekstremë lëvizin atje dhe kjo po krijon një shoqëri shumë helmuese. Jo një shoqëri më e ekuilibruar, një shoqëri e përbërë nga ekstreme.”
– “Shtet përfaqësues për SHBA-në”
Lidhur me marrëdhëniet SHBA-Izrael, ajo e përshkroi Izraelin si “shtetin përfaqësues” të SHBA-së në rajon. “SHBA-ja është ndoshta kërcënimi më i madh për paqen botërore. Dhe së bashku po krijojnë një vend shumë të pasigurt për njerëzit në atë rajon”, tha ajo
– Djegia e pasaportës së saj
Stoelen kujtoi gjithashtu se kishte marrë mesazhe kërcënuese nga një person në Oslo pasi ndau një video të saj duke djegur pasaportën e saj izraelite. “Njëri prej tyre më dërgoi një foto me një armë dhe pastaj tha se ai dhe disa të tjerë do të vinin dhe do të më copëtonin”.
Ajo kritikoi policinë norvegjeze për keqmenaxhimin e situatës dhe akuzoi Norvegjinë se është bashkëfajtore në krimet e luftës të Izraelit.
“Për shkak se ata kanë investuar 22.6 miliardë krona norvegjeze (2.2 miliardë dollarë) në kompani të lidhura me pushtimin dhe kështu po përfitojnë drejtpërdrejt nga humbja e jetës njerëzore. Ata në thelb po tregojnë se e vlerësojnë vlerën e aksionarëve mbi njerëzimin”, shtoi Stoelen.
Lidhur me mbulimin mediatik, ajo tha se palestinezët shpesh portretizohen si “çnjerëzorë”. “Gjatë 80 viteve të pushtimit brutal, ata treguan se më njerëzorët midis nesh ishin në fakt ata. Prandaj mendoj se është Perëndimi që duhet ta vërë në pikëpyetje veten dhe të shohë se si e lejoi të ndodhte e gjithë kjo”, tha ajo.
