Ministri belg i Punëve të Jashtme, Maxime Prevot, ka bërë të ditur se aktualisht Belgjika nuk po shqyrton mbylljen e hapësirës së saj ajrore për avionët e lidhur me konfliktin në Lindjen e Mesme, transmeton Anadolu.
Duke folur në një komision parlamentar, siç raporton transmetuesi RTBF, Prevot tha se “shumë avionë nuk kalojnë përmes vendit tonë për të ofruar ndihmë ushtarake për shtetet e Gjirit”.
Komentet vijnë teksa vendet evropiane po mbajnë qëndrime të ndryshme për këtë çështje. Spanja ka njoftuar se do të ndalojë avionët amerikanë të lidhur me konfliktin, duke reflektuar kundërshtimin e fortë ndaj sulmeve të fundit SHBA-Izrael kundër Iranit.
Ndërkohë, SHBA ka kritikuar Francën për atë që e ka cilësuar si mungesë bashkëpunimi, megjithëse Parisi nuk ka konfirmuar zyrtarisht ndonjë kufizim të hapësirës ajrore, sipas raportit.
Në Belgjikë, ky qëndrim ka nxitur kritika nga opozita. Deputeti Nabil Bouliki nga Partia e Punëtorëve (PTB) i bëri thirrje qeverisë të ndjekë shembullin e Spanjës dhe të bllokojë avionët e lidhur me operacionet amerikane dhe izraelite.
Ai tha se do ta ngrejë sërish çështjen me ministrat e Punëve të Jashtme dhe të Mbrojtjes, duke argumentuar se Belgjika duhet të mbajë një qëndrim më të qartë në një kohë tensionesh në rritje në rajon.
“Belgjika duhet të ndjekë shembullin e Spanjës dhe të mbyllë hapësirën ajrore për avionët amerikanë dhe izraelitë të përfshirë në sulmet ndaj Iranit”, tha Bouliki.
