Grupi i rezistencës palestineze Hamas tha sot se do të vazhdojë të zhvillojë marrëdhëniet me regjimin sirian, pas një ndërprerjeje prej mbi dhjetë vitesh, transmeton Anadolu Agency (AA).
“Forcimi i kësaj marrëdhënieje i shërben aftësisë sonë për t’u përballur me agresionin izraelit në rritje”, tha në një deklaratë zëdhënësi i Hamasit, Hazem Qassem.
Përfaqësuesit e Hamasit dhe fraksioneve të tjera palestineze të mërkurën u takuan me presidentin e regjimit sirian Bashar al-Assad në kryeqytetin Damask.
Të premten, mbrojtja ajrore siriane ndaloi një sulm raketor izraelit në kryeqytetin Damask.
“Këto sulme janë krim kundër kombit tonë dhe një shtrirje e vrasjeve dhe terrorizmit kundër popullit palestinez”, tha Qassem.
Që nga viti 1999, Hamasi kishte përdorur Damaskun si selinë e udhëheqjes së tij jashtë vendit, deri në vitin 2012, kur grupi palestinez ndërpreu marrëdhëniet me regjimin dhe mbylli zyrat e tij në Siri pas shpërthimit të konfliktit sirian.
Grupi qeveris më shumë se dy milionë palestinezë në Rripin e Gazës.
