Komuna e qytetit Khan Younis, në jug të Rripit të Gazës, ku ushtria izraelite u tërhoq duke lënë pas shkatërrime të mëdha, filloi të pastrojë grumbujt e rrënojave në rrugë për të lehtësuar kalimin e ambulancave dhe qytetarëve, transmeton Anadolu.
Punonjësit e Komunës së Khan Younis vazhdojnë të punojnë me burime të kufizuara për shkak të mungesës së karburantit dhe automjeteve për të hequr rrënojat e grumbulluara si pasojë e shkatërrimit të shtëpive dhe vendeve të punës gjatë sulmit tokësor 4-mujor të ushtrisë izraelite.
Një nga zyrtarët e Komunës së Khan Younis, Iyad Abu Khalil tha se pas tërheqjes së ushtrisë izraelite nga qyteti, me kërkesat e qytetarëve për hapjen e rrugëve dhe largimin e rrënojave, arritën të hapnin shumë rrugë me mjete të thjeshta, pavarësisht mungesës së karburantit dhe shkatërrimit të pajisjeve të rënda ndërtimore nga ushtria izraelite.
Ushtria izraelite njoftoi tërheqjen e saj nga Khan Younis në jug të Rripit të Gazës më 7 prill, katër muaj pasi kishte nisur sulm tokësor me pretekstin e shpëtimit të të burgosurve izraelitë të mbajtur nga Hamasi.
Sulmet izraelite prekën shumë qytetin, duke shkaktuar dëme të mëdha në rrugë, shtëpi dhe infrastrukturë.
