Ndalohen në Kajro emigrantët e parë në rrugën drejt SHBA-ve

Zyrtarë të aeroportit të Kajros thonë se shtatë emigrantëve të mundshëm të cilët udhëtonin drejt Shteteve të Bashkuara të Amerikës, gjashtë irakianëve dhe një shtetasi të Jemenit, u është ndaluar hyrja në aeroplanin e EgyptAir i cili kishte për destinacion aeroportin JFK në New York, raporton Anadolu Agency (AA).

Zyrtarët të cilët kanë folur në kushte anonimiteti, thanë se aktivitetet të cilat i kanë ndërmarrë të shtunën janë në përputhje me vendimin e presidentit të Shteteve të Bashkuara të Amerikës, Donald Trump i cili vendosi një ndalesë tremujore për hyrje në shtet të refugjatëve nga shtetet muslimane Siri, Irak, Iran, Sudan, Libi, Somali dhe Jemen.

Thuhet se shtatë emigrantët të cilët ishin të shoqëruar nga oficerë të UNHCR-së, u ndaluan të hyjnë në avion, pasi autoritetet e aeroportit të Kajros kontaktuan kolegët e tyre në JFK.

Trump ndalon pranimin e refugjatëve nga Siria

Me një dekret presidencial të nënshkruar ditën e djeshme nga presidenti amerikan Donald Trump u ndalua pranimi i refugjatëve sirianë deri në një urdhër të dytë, si dhe u pezulluan për 4 muaj aplikimet e të gjithë refugjatëve.