Palestinezët që jetojnë në Izrael formuan një njësi ndihme emergjente për të mbështetur të prekurit nga tërmetet me qendër në Kahramanmaraş të Turqisë, raporton Anadolu.
Kryetari i Shoqatës së Ndihmës së Tokave Palestineze të vitit 1948, Ghazi Isa për AA tha se sapo morën lajmin për tërmetin, e formuan këtë njësi nën ombrellën e “Shoqatës së Punëve Bamirëse”.
“Njësia kontaktoi institucionet zyrtare në Turqi për të dërguar ndihmë urgjente. Ne po përpiqemi të dërgojmë ekip për të monitoruar nga afër punën dhe për të përgatitur një delegacion mjekësh dhe infermierësh për të krijuar një zonë ndihme të ngjashme me një spital fushor në kufirin Turqi-Siri”, tha Isa.
Ai theksoi se ka një ekip me të cilin punojnë në Siri dhe se ky ekip ka filluar përgatitjet për largimin e mbeturinave, shpëtimin e të lënduarve dhe shpërndarjen e ndihmës emergjente.
Duke treguar se kanë nisur një fushatë për mbledhjen e donacioneve nga qytetarët palestinezë që jetojnë në Izrael, Isa tha se ata do të shkojnë në Turqi këtë mbrëmje me një nga zyrtarët e shoqatës.
“Për pak orë do të fillojë procesi i shpërndarjes së ndihmës, përfshirë tendat dhe pajisjet e ngrohjes. Brenda dy ditësh do të mbërrijë një ekip mjekësh, infermierësh dhe personel shpëtimi”, tha Isa.
