Vendimi i kryeministrit izraelit Benjamin Netanyahu për të lejuar hyrjen e ndihmave humanitare në Gaza është përballur me kritika të ashpra nga politikanët e djathtë dhe grupet nacionaliste në vend.
Ministri i Sigurisë Kombëtare, Itamar Ben-Gvir, e quajti vendimin një “gabim të rëndë”. Ndërkohë, ministri i Trashëgimisë, Amichay Eliyahu – gjithashtu nga partia e Ben-Gvir – e përshkroi planin si një “tragjedi”, duke thënë se “lejimi i ndihmave humanitare tani dëmton drejtpërdrejt përpjekjet për fitore dhe është një tjetër pengesë për lirimin e pengjeve”.
Deputetë të partisë Likud të Netanyahut kanë reaguar ashpër. Avichai Boston e quajti vendimin “çmenduri”, ndërsa Moshe Saada tha se dërgimi i ndihmave në të njëjtën kohë me zgjerimin e ofensivës është “një vendim i gabuar dhe imoral”.
Ministri i Financave, Bezalel Smotrich, nuk ka komentuar ende, por më herët kishte deklaruar se do të largohej nga qeveria “nëse një grimcë ndihme humanitare hyn në Gaza dhe arrin te Hamasi”.
Ndërkohë, grupi i ekstremit të djathtë Tzav 9, i cili më parë ka bllokuar kamionët e ndihmave për Gazën, ka thirrur aktivistët e tij të rifillojnë aksionet.
“Netanyahu, kjo është përgjegjësia jote. Hamasi nuk mund të përkëdhelet dhe të ndihmohet derisa pengu i fundit të kthehet në shtëpi,” deklaroi grupi në një mesazh publik. /mesazhi
