Të paktën 853 emigrantë kaluan La Manshin ilegalisht drejt brigjeve angleze të mërkurën, njoftoi të premten Zyra e Brendshme britanike, një rekord i ri që e çon numrin e personave që kanë marrë këtë rrugë në më shumë se 21 000 këtë vit.
Pavarësisht premtimeve të qeverisë britanike për t’i bërë këto kalime “jopraktike”, numri i tyre është rritur në mënyrë të vazhdueshme që nga fundi i vitit 2018.
Rekordi i fundit ditor ishte gushti i kaluar, me 828 kalime.
Nga ana franceze, nga janari deri në fund të tetorit 2021, prefektura detare regjistroi “1 008 ngjarje të lidhura me përpjekjet ose kalimet në BM nga deti, që përfshinin 24 655 persona, nga të cilët 5 713 të humbur u shpëtuan”.
Shtrëngimi i kushteve të emigracionit është një premtim i madh nga qeveria e Boris Johnson pas Brexit, që kërkon të kufizojë aksesin në azil.
Kalimet e paligjshme janë subjekt i rregullt i tensioneve mes Parisit dhe Londrës, me autoritetet britanike që i konsiderojnë të pamjaftueshme përpjekjet e ndërmarra nga pala franceze për t’i parandaluar ato, pavarësisht pagesës së ndihmës financiare. /atsh
