Kryeministri britanik Keir Starmer tha se lufta me Iranin “nuk është lufta jonë” dhe se vendi i tij nuk do të përfshihet në të, pasi presidenti amerikan Donald Trump tha se po shqyrton tërheqjen e SHBA-së nga NATO, transmeton Anadolu.
Duke folur në një konferencë për media në “Downing Street”, Starmer tha se qeveria e tij po “punon me ritëm të shpejtë” për të mbështetur deeskalimin dhe paqen, por pranoi se konflikti do të ndikojë në të ardhmen e vendit.
Ai tha se një takim që do të organizohet këtë javë nga sekretarja e Jashtme, Yvette Cooper do të synojë të përparojë sigurinë detare në Gjirin Persik. Pas këtij takimi, planifikuesit ushtarakë të Britanisë do të mblidhen për të vlerësuar se si të “organizojmë aftësitë tona” për të siguruar që Ngushtica e Hormuzit të jetë e arritshme dhe e sigurt pas përfundimit të luftimeve, tha ai.
I pyetur nëse njerëzit duhet të ndryshojnë sjelljen e tyre në shtëpi për shkak të një krize energjetike, Starmer tha se qeveria po e monitoron me kujdes situatën. “Ne duhet të kemi lidhje më të ngushta me Evropën për mbrojtjen, sigurinë dhe të ardhmen ekonomike të vendit”, tha ai pasi Trumpi ngriti mundësinë e një tërheqjeje të SHBA-së nga NATO.
“Cilido qoftë presioni mbi mua dhe të tjerët, cilado qoftë zhurma, unë do të veproj në interesin kombëtar britanik në të gjitha vendimet që marr dhe kjo është arsyeja pse kam qenë absolutisht i qartë se kjo nuk është lufta jonë, ose nuk do të përfshihemi në të”, shtoi ai.
Komentet e Starmerit erdhën pasi Trumpi i tha gazetës britanike “Daily Telegraph” se po shqyrton tërheqjen e SHBA-së nga NATO pasi aleatët refuzuan të mbështesin luftën e Iranit.
