Organizata Ndërkombëtare e Punës (ILO) ka vendosur të ngrejë statusin e Palestinës nga një “lëvizje kombëtare çlirimtare” në “shtet vëzhgues jo-anëtar”, duke i dhënë asaj më shumë të drejta dhe pjesëmarrje të zgjeruar në veprimtaritë e kësaj agjencie të OKB-së.
Vendimi u mor me konsensus të hënën gjatë Komitetit për Çështjet e Përgjithshme në Konferencën Ndërkombëtare të Punës në Gjenevë, në edicionin e saj të 113-të. Rezoluta pritet të miratohet zyrtarisht në seancën plenare të së enjtes.
Ky zhvillim përkon me qëndrimin e shumë agjencive të tjera të OKB-së – si UNESCO dhe OBSH – të cilat e njohin Palestinën si shtet vëzhgues, në përputhje me Rezolutën ES-10/23 të Asamblesë së Përgjithshme të OKB-së të miratuar në maj 2024.
Me këtë status të ri, Palestina do të mund të mbajë fjalime për të gjitha çështjet në rendin e ditës, të paraqesë propozime, të marrë pjesë në të gjitha mbledhjet me delegacione tripalëshe, dhe të nominojë përfaqësues në Byronë e Konferencës duke nisur nga viti 2026.
Ambasadori palestinez në OKB, Ibrahim Khraishi, e përshëndeti vendimin si një “përgjigje e qartë dhe e fortë ndaj mohimit nga Knesseti izraelit për ekzistencën e një shteti palestinez”.
“Disa vende vazhdojnë të refuzojnë drejtësinë dhe të aplikojnë standarde të dyfishta, duke minuar parimet themelore të legjitimitetit ndërkombëtar dhe drejtësisë,” theksoi ai.
Khraishi shprehu habi për qëndrimin e vetëm kundërshtues të Hungarisë, duke kujtuar se “Hungaria e ka njohur shtetin e Palestinës që në vitin 1988”.
Rezoluta gëzoi mbështetje të gjerë nga Grupi Arab, Organizata e Bashkëpunimit Islamik, si dhe nga vende si Franca, Kina, Spanja dhe Zvicra. Të dyja grupet – ai i Punëdhënësve dhe i Punëtorëve – e mbështetën gjithashtu rezolutën, duke theksuar rëndësinë e saj humanitare dhe përputhshmërinë me vlerat e ILO-s.
“Kjo nuk është një lëvizje thjesht simbolike,” tha Khraishi, “por pjesë thelbësore e luftës së ligjshme kombëtare dhe politike të popullit palestinez për drejtësi, sovranitet dhe vetëvendosje.” /mesazhi
