The Daily Telegraph hoqi një artikull që i atribuonte gabimisht deklarata nxitëse presidentit të Türkiyes, Recep Tayyip Erdoğan, pasi kryeredaktori i gazetës pranoi se citimet “duket se janë të vjetra ose krejtësisht të sajuara”.
Artikulli, i publikuar të shtunën më 12 prill, pretendonte se Erdoğan kishte kërcënuar të pushtonte Izraelin, duke cituar deklarata të fabrikuara që supozohej se ishin bërë në një aktivitet politik.
Raporti citonte presidentin turk të kishte thënë: “Ashtu siç hymë në Libi dhe Karabak, mund të hyjmë edhe në Izrael”, deklarata që në fakt nuk janë bërë kurrë.
Kryeredaktori i gazetës, Paul Nuki, publikoi një reagim të shkurtër duke e pranuar gabimin:
“Përshëndetje, e kemi hequr lajmin. Citimet duket se janë të vjetra ose plotësisht të fabrikuara. Kërkojmë ndjesë,” shkroi ai në rrjetet sociale.
Kjo çështje ka ngritur sërish pikëpyetje mbi standardet editoriale të një prej gazetave më të njohura britanike. Artikulli u publikua në një periudhë tensionesh të reja në Lindjen e Mesme pas një armëpushimi të brishtë, kur dezinformimi për aktorët rajonalë mund të ketë pasoja serioze.
Njëkohësisht, është vënë re një prirje e disa mediave perëndimore për të keqinterpretuar politikat e jashtme të Türkiyes dhe për të shtrembëruar deklaratat e zyrtarëve turq.
Ankaraja ka bërë vazhdimisht thirrje që mediet ndërkombëtare t’i respektojnë standardet bazë të gazetarisë gjatë raportimit për çështjet që lidhen me Türkiyen, duke paralajmëruar se raportimet e fabrikuara ose të nxjerra jashtë kontekstit nxisin ndjenja kundër Türkiyes dhe i dëmtojnë përpjekjet diplomatike në rajone të paqëndrueshme.
Deri tani, The Daily Telegraph nuk ka publikuar një korrigjim zyrtar përtej deklaratës së shkurtër në rrjetet sociale nga kryeredaktori.
