Presidenti amerikan Donald Trump ka njoftuar se do të zhvillojë një takim të dytë me kryeministrin izraelit Benjamin Netanyahu këtë mbrëmje, një ditë pas darkës së tyre në Shtëpinë e Bardhë.
“Ai do të vijë më vonë. Do të flasim, thuajse ekskluzivisht, për Gazën. Duhet ta zgjidhim këtë çështje,” u tha Trump gazetarëve.
“Është një tragjedi, dhe ai do ta zgjidhë, unë dua ta zgjidh, dhe mendoj se edhe pala tjetër dëshiron të njëjtën gjë.”
Ndërkohë, i dërguari special i Trump-it, Steve Witkoff, tha se është optimist për një marrëveshje mes Izraelit dhe Hamasit.
“Shpresojmë që deri në fundjavë të kemi një marrëveshje që do të sjellë një armëpushim 60-ditor,” u shpreh Witkoff. “Dhjetë pengje të gjallë do të lirohen. Nëntë të vdekur do të kthehen.”
Kjo është vizita e tretë e Netanyahu-t në Uashington që nga rikthimi i Trump në pushtet në janar. Ai do të qëndrojë në kryeqytetin amerikan deri të enjten. /mesazhi
