Presidenti i SHBA-së, Donald Trump e përshkroi takimin e tij të së enjtes me presidentin ukrainas Volodymyr Zelenskyy si shumë të mirë, duke sinjalizuar një vrull të mundshëm drejt përfundimit të konfliktit, transmeton Anadolu.
Takimi njëorësh në Davos të Zvicrës, në kuadër të Forumit Ekonomik Botëror, vjen në një kohë kur administrata amerikane po intensifikon përpjekjet diplomatike në të dyja anët e vijës së frontit.
“Pata një takim shumë të mirë me presidentin Zelenskyy. Të gjithë duan që lufta të përfundojë”, tha Trump pas takimit.
Zelenskyy gjithashtu e përshkroi takimin si të mirë.
Trumpi konfirmoi se është planifikuar një takim me presidentin rus Vladimir Putin dhe të dërguarit amerikanë Steve Witkoff dhe Jared Kushner, por koha e saktë e samitit mbetet e paqartë.
Putin kishte deklaruar më herët të enjten se do t’i priste të dërguarit në Moskë sot ndërsa Trumpi tha se takimi do të zhvillohet të premten.
“Kemi paqe në Lindjen e Mesme dhe besoj se një tjetër po vjen shumë shpejt”, tha Trumpi më herët gjatë ditës, duke iu referuar luftës Rusi–Ukrainë.
Witkoff e përforcoi këtë optimizëm, duke sugjeruar se negociatorët aktualisht janë të përqendruar në zgjidhjen e vetëm një çështjeje përfundimtare.
