Pothuajse gjysma e të gjitha vdekjeve te fëmijët nën moshën 5-vjeçare shkaktohen nga uria, paralajmëroi sot zonja e parë turke Emine Erdoğan, duke bërë thirrje për veprime globale për ta zvogëluar shpërdorimin e ushqimit në përvjetorin e katërt të Ditës Ndërkombëtare të Zero Mbetjeve.
Në një video-mesazh të ndarë në rrjetin social X duke shënuar 30 marsin, të caktuar si Dita Ndërkombëtare e Zero Mbetjeve nga Asambleja e Përgjithshme e OKB-së në vitin 2022 nën udhëheqjen e Türkiyes, ajo theksoi kostot njerëzore dhe mjedisore të shpërdorimit të ushqimit dhe bëri thirrje për ndërgjegjësim dhe ndryshim më të madh të sjelljes.
Erdoğan tha se shpëtimi i vetëm i një të katërtës së ushqimit të shpërdoruar globalisht mund të jetë i mjaftueshëm për të eliminuar urinë, duke vënë në dukje se 673 milionë njerëz përballen me urinë dhe mbi 2 miliardë nuk kanë qasje në ushqim të përshtatshëm dhe të ekuilibruar.
“Tema e këtij viti është vendosur si shpërdorimi i ushqimit”, tha ajo duke vënë në dukje se 673 milionë njerëz në të gjithë botën po luftojnë me urinë, më shumë se 2 miliardë nuk kanë ushqim të përshtatshëm dhe të ekuilibruar ndërsa një në çdo 12 persona jeton nën rrezikun e urisë kronike.
“Ne duam të njohim reagimin zinxhir pas çdo cope ushqimi të hedhur dhe kolektivisht t’i themi ‘ndalo’ këtij trendi”, shtoi ajo.
Erdoğan nënvizoi se rreth 2,3 miliardë tonë ushqim, ekuivalent me 5,8 trilionë vakte, humbasin ose shpërdorohen çdo vit, duke theksuar se “çdo kafshatë e shpërdoruar mbart të drejtat e atyre, jeta e të cilëve varet prej saj”.
“Mjerisht, gati gjysma e vdekjeve te fëmijët nën moshën 5-vjeç në gjithë botën shkaktohen nga uria. Megjithatë, nëse do të mund të rikuperonim vetëm një të katërtën e ushqimit të shpërdoruar globalisht, do të mund t’i jepnim fund urisë në botë”, tha ajo.
Erdogan shtoi se humbja dhe shpërdorimi i ushqimit përbëjnë 8 për qind deri në 10 për qind të emetimeve globale të gazrave serrë, duke rritur presionin mbi mjedisin dhe klimën.
Duke cituar Raportin e Indeksit të Shpërdorimit të Ushqimit, Erdogan tha se 60 për qind e shpërdorimit të ushqimit ndodh në nivel familjeje, duke theksuar se ndryshimet e thjeshta të sjelljes mund të ulin ndjeshëm shpërdorimin.
Referuar projektit “Zero Mbetje” të Türkiyes të nisur në vitin 2017, ajo tha se përvoja ka treguar se transformimi i sjelljes është një nga politikat më efektive mjedisore dhe klimatike.
“Edhe duke parandaluar prishjen e një fruti të vetëm, ne mund të kursejmë ujin, energjinë dhe punën e përdorur për ta prodhuar atë”, tha zonja e parë turke duke i nxitur njerëzit t’i shndërrojnë kuzhinat në vende respekti për burimet dhe jo në qendra mbeturinash.
Ajo bëri thirrje për veprim kolektiv për të ndërtuar “një botë të drejtë ku asnjë fëmijë nuk do të mbetet i uritur”.
