Të paktën gjashtë persona humbën jetën nga shembja e një shtëpie në Afganistanin qendror, pasi një tërmet i fuqishëm me magnitudë 5.8 goditi rajonin Hindu Kush, duke lëkundur pjesë të ndryshme të Afganistanit dhe Pakistanit fqinj, transmeton Anadolu.
Ministria e Informacionit njoftoi se gjashtë viktimat humbën jetën kur një shtëpi u shemb në rrethin Bagrami, në provincën qendrore të Kabulit, si dhe një person mbetet ende i zhdukur.
Sipas Qendrës Gjermane për Kërkime në Gjeoshkencë, tërmeti ndodhi në një thellësi prej 181 kilometrash në orën 16:12 GMT.
Fillimisht, tërmeti u mat me magnitudë 5.9 dhe më pas u rishikua në 5.8.
Sipas një banori lokal, Obaidullah Baheer, i cili shkroi në rrjetin social amerikan X, lëkundjet u ndjenë në kryeqytetin afgan Kabul, sipas një banori lokal.
Tërmeti u ndje gjithashtu në kryeqytetin pakistanez Islamabad, në provincën veriperëndimore Khyber Pakhtunkhwa dhe në rajonin verior Gilgit-Baltistan.
Lëkundjet u ndjenë gjithashtu në Kashmirin e administruar nga India.
Departamenti Meteorologjik i Pakistanit fillimisht e vlerësoi tërmetin me magnitudë 6.1.
