Situata në zgrip: lojë diplomatike nën tensione ushtrake dhe ekonomike
Teherani është gati për bisedime sapo Shtetet e Bashkuara të heqin bllokadën, tha ambasadori iranian në OKB, Amir-Saeid Iravani.
Si parakusht për çdo raund të ri bisedimesh, Iravani tha se SHBA-të duhet të ndalojnë “shkeljen e armëpushimit”, shkruan media iraniane Shargh, e raportuar nga Al Jazeera.
“Sapo të heqin bllokadën, raundi tjetër i bisedimeve do të mbahet në Islamabad”, tha Iravani, duke shtuar se “Irani është gati për çdo skenar”.
“Ne nuk kemi filluar agresionin ushtarak. Nëse ata kërkojnë një zgjidhje politike, ne jemi gati. Nëse ata kërkojnë luftë, Irani është gati edhe për këtë,” përfundoi ambasadori iranian.
Negociatat gjithnjë e më të pasigurta
Në të njëjtën kohë, vazhdimi i negociatave është gjithnjë e më i pasigurt. Megjithëse përgatitjet e sigurisë për një raund të ri bisedimesh janë ende në vend në kryeqytetin pakistanez Islamabad, optimizmi është zbehur ndjeshëm dhe është gjithnjë e më pak e mundshme që takimi të zhvillohet këtë javë.
Tensionet po rriten edhe në terren. Irani ka kërcënuar përsëri të sulmojë objektivat amerikane dhe izraelite nëse ajo që ata pretendojnë se është “agresion” kundër Teheranit vazhdon dhe një komandant i lartë ushtarak ka paralajmëruar vendet fqinje se mund të mbeten pa naftë nëse lejojnë që territori i tyre të përdoret për sulme ndaj Iranit.
Ndërkohë, administrata amerikane vazhdon të rrisë presionin. Uashingtoni ka konfirmuar se bllokada e porteve iraniane dhe eksporteve të naftës mbetet në fuqi, dhe masat shtesë përfshijnë pezullimin e pagesave financiare për Irakun me qëllim që të ushtrohet presion mbi grupet e armatosura pro-iraniane.
Kriza tashmë po jep pasoja jashtë rajonit. Bashkimi Evropian po përgatit masa për të lehtësuar krizën energjetike, duke përfshirë ulje të mundshme të taksave të energjisë elektrike dhe mbushje të koordinuar të objekteve të magazinimit të gazit, ndërsa industria e linjave ajrore përgjigjet me shkurtime – Lufthansa njoftoi anulimin e 20,000 fluturimeve për shkak të rritjes së çmimeve të karburantit.
Tensione edhe në det
Ndërkohë, situata e sigurisë në det po përkeqësohet më tej. Forcat iraniane sulmuan një anije kontejnerësh në brigjet e Omanit, duke dëmtuar urën e drejtimit, por duke lënë ekuipazhin të padëmtuar.
E gjithë kjo e ndërlikon më tej situatën tashmë të brishtë, ndërsa në të njëjtën kohë presioni po rritet brenda SHBA-së, ku disa demokratë kritikojnë një luftë të mundshme me Iranin. /tesheshi
