Ambasadorët e QUINT-it gjatë ditës së martë kanë vizituar Manastirin e Deçanit.
Lajmin e ka bërë të ditur ambasadori i Shteteve të Bashkuara të Amerikës në Kosovë, Jeff Hovenier.
“Jam i kënaqur të bashkohem me kolegët nga trupi diplomatik i Kosovës në një vizitë në Manastirin e bukur historik të Deçanit”, ka shkruar ai në rrjetin social Twitter.
Kjo vizitë e ambasadorëve vjen pas deklaratës së përbashkët lidhur çështjen e pronës së Manastirit të Deçanit, duke i bërë thirrje Qeverisë së Kosovës që në përputhje me vendimin e Gjykatës Kushtetuese, të veprojë pa u vonuar për zbatimin e plotë të regjistrimit të ligjshëm të tokës së Manastirit të Deçanit.
Në deklaratën e përbashkët të QUINT-it thuhet se në maj të vitit 2016, Gjykata Kushtetuese e Kosovës vërtetoi pronësinë e Manastirit të Deçanit mbi disa hektarë tokë, ndërkaq përkundër këtij vendimi të ligjshëm dhe kërkesave pasuese, vendimi i Gjykatës ende nuk është zbatuar.
