Një person është arrestuar në Pejë të premten, pasi dyshohet se ka ofenduar familjen Haradinaj përmes një videoje të publikuar në rrjetet sociale.
Sipas Policisë, pas identifikimit të rastit është kryer kontroll në shtëpinë e të dyshuarit, ku janë gjetur dhe sekuestruar dy armë zjarri. Pas intervistimit, me vendim të prokurorit, ai është dërguar në mbajtje për 48 orë.
“Është arrestuar i dyshuari mashkull kosovar, për shkak se në rrjetin social ka postuar një video incizim duke ofenduar familjen Haradinaj. Gjatë kontrollit në shtëpinë e tij, janë gjetur dhe konfiskuar: dy armë zjarri – pistoleta, njëra me 4 copë fishekë. I dyshuari është intervistuar dhe me vendim të prokurorit i është caktuar masa e ndalimit për 48 orë”, thuhet në raportin e PK-së./
