Britania e Madhe njoftoi sot se Selia e Komunikimeve Qeveritare (GCHQ), agjencia e spiunazhit që ofron të dhëna të inteligjencës për qeverinë dhe ushtrinë, do të drejtohet nga zëvendësdrejtoresha e MI5, Anne Keast-Butler, raporton Anadolu.
Ajo do të marrë detyrën në maj nga Jeremy Fleming, i cili në janar tha se do të largohej nga posti pas gjashtë vitesh.
Keast-Butler është femra e parë që emërohet në krye të detyrës në GCHQ. Emërimi i saj u bë pas një procesi rekrutimi ndërqeveritar të kryesuar nga Sekretari i Kabinetit, Simon Case.
Duke shpallur emërimin, Sekretari i Jashtëm, James Cleverly tha: “Anne Keast-Butler ka histori mbresëlënëse në zemrën e rrjetit të sigurisë kombëtare të Britanisë, duke ndihmuar në përballimin e kërcënimeve që paraqesin terroristët, kriminelët kibernetikë dhe fuqitë e huaja keqdashëse. Ajo është kandidatja ideale për të udhëhequr GCHQ dhe Anne do të vë në përdorim përvojën e saj të madhe për të ndihmuar në mbajtjen e publikut britanik të sigurt”.
Keast-Butler tha se është e kënaqur që u emërua si drejtoresha e 17-të e agjencisë. “Misioni i GCHQ për të mbajtur të sigurt Britaninë është po aq frymëzues sot sa ishte kur u themelua më shumë se 100 vjet më parë, e cila vepron m’u në zemër të Britanisë dhe aleatëve tanë, përgjigjes ndaj disa prej çështjeve më sfiduese të kohës sonë”.
