Emisari i posaçëm amerikan për Lindjen e Mesme, Steve Witkoff, ka deklaruar se përgjigjja e Hamasit ndaj propozimit për armëpushim në Gaza “është plotësisht e papranueshme dhe na kthen pas”.
“Hamas duhet të pranojë kornizën që kemi propozuar si bazë për bisedime të ndërmjetme, të cilat mund të fillojnë menjëherë javën që vjen,” shkroi Witkoff në një postim në X.
Ai shtoi se kjo është e vetma mënyrë për të mbyllur një marrëveshje armëpushimi 60-ditore në ditët në vijim, ku gjysma e pengjeve të gjalla dhe gjysma e trupave të pajetë do të kthehen te familjet e tyre, dhe ku mund të zhvillohen negociata serioze për një armëpushim të përhershëm.
Siç është raportuar më herët, Hamasi ka thënë se ka dhënë një përgjigje përmes ndërmjetësve, ku parashikohet lirimi i 10 pengjeve izraelite dhe kthimi i 18 trupave në këmbim të një numri të caktuar të të burgosurve palestinezë.
Grupi palestinez theksoi se përgjigjja e tij është dhënë në një kuadër që garanton armëpushim të përhershëm, tërheqje të plotë të ushtrisë izraelite nga Gaza dhe leje të plotë për ndihmat humanitare. /mesazhi
