Shteti amerikan i Floridës ekzekutoi të martën dy burra të dënuar me vdekje, duke u bërë shteti i parë në SHBA që kryen dy ekzekutime në të njëjtën ditë që nga viti 1964.
I pari që u ekzekutua ishte James Duckett, 68 vjeç, ish-polic, i cili u dënua me injeksion vdekjeprurës në Burgun Shtetëror të Floridës pranë Starke. Ai ishte shpallur fajtor për rrëmbimin, përdhunimin dhe vrasjen e 11-vjeçares Teresa Mae McAbee në vitin 1987. Sipas prokurorisë, vajza ishte rrëmbyer nga një dyqan ku kishte shkuar për të blerë një laps, ndërsa trupi i saj, i mbytur, u gjet në një liqen një ditë më vonë.
Pas ekzekutimit, nëna e viktimës, Dorthy Tula, tha se ishte e lehtësuar që procesi kishte marrë fund pas afro katër dekadash.
Më pak se pesë orë më vonë, në të njëjtën dhomë ekzekutimi u ekzekutua edhe Dominick Occhicone, mbi 80 vjeç, për vrasjen në vitin 1986 të prindërve të ish-të dashurës së tij, Anita Gerrety. Edhe ai u ekzekutua me injeksion vdekjeprurës me tre substanca.
Gjykata e Lartë e SHBA-së hodhi poshtë të martën kërkesat e fundit për pezullimin e ekzekutimeve, si për Duckett ashtu edhe për Occhicone.
Occhicone ishte personi më i moshuar i ekzekutuar në historinë moderne të Floridës dhe i dënuari i 12-të i ekzekutuar në këtë shtet gjatë këtij viti.
Në një deklaratë, fëmijët e viktimave të Occhicone thanë se dita shënonte fundin e një rrugëtimi të gjatë dhe të dhimbshëm për familjen e tyre, duke shtuar se do ta nderojnë gjithmonë kujtimin e prindërve të tyre me dashuri.
Ky ishte rasti i parë që nga viti 1964 kur Florida ekzekuton dy të dënuar me vdekje brenda së njëjtës ditë. /mesazhi
