Ekipet e shpëtimit në Japoni janë në kërkim të gati 250 personave që figurojnë ende të zhdukur pas tërmetit që goditi vendin në orët e para të 1 janarit.
Të enjten vonë ka përfunduar periudha prej 72 orësh që kur goditi tërmeti, që konsiderohet kritike për të gjetur të mbijetuar, shkruan BBC.
Të premten, numri i të vdekurve nga tërmeti me magnitudë 7.6 ballë në gadishullin e largët Noto u rrit në 92.
Ekipet e shpëtimit kanë dyfishuar numrin e personave që kanë marrë pjesë në operacionet e kërkim shpëtimit, në gjithsej 4600 persona, njoftoi agjencia e lajmeve Kyodo.
Shumë njerëz mendohet se janë bllokuar nën shtëpitë e tyre të rrënuara – kryesisht në qytetet Suzu dhe Wajima.
Sipas raportimeve shtëpitë nuk kanë qenë të ndërtuara për t’u bërë ballë tërmeteve të fuqishme, të cilat shpesh e godasin vendin.
Dhjetëra mijëra banorë janë ende pa energji elektrike dhe ujë, ndërsa qindra kanë mbetur të izoluar për shkak të rrëshqitjeve të dheut dhe rrugëve të bllokuara. /koha