Zëvendëskryeministrja e Ukrainës ka thënë se të gjitha gratë, fëmijët dhe të moshuarit janë evakuuar nga fabrika e rrethuar e çelikut Azovstal, në Mariupol.
Duke bërë njoftimin, Iryna Vereshchuk tha: “Urdhri i presidentit është zbatuar: të gjitha gratë, fëmijët dhe të moshuarit janë evakuuar nga Azovstal. Kjo pjesë e operacionit humanitar në Mariupol ka përfunduar”.
Nuk u dhanë detaje të mëtejshme.
Ekipet e shpëtimit kanë punuar për të evakuuar civilët nga tunelet nën fabrikën e çelikut në qytetin port të Mariupolit për disa ditë.
Agjencia ruse e lajmeve Tass raportoi më parë se 50 civilë ishin evakuuar nga centrali të shtunën, dhe një numër i ngjashëm u largua të premten.
Civilët kishin qenë në fabrikë me luftëtarët ukrainas duke bërë rezistencën përfundimtare për të parandaluar një pushtim të plotë të Mariupolit.
Mendohet se rreth 2 mijë ushtarë ukrainas kanë mbetur pasi janë izoluar për javë të tëra ndërsa forcat ruse kanë avancuar.
Ata janë rezistentët e fundit në një zonë thuajse të shkatërruar dhe kanë refuzuar vazhdimisht të dorëzohen. /koha
