Zona e shpallur “e sigurt”, al-Mawasi, vazhdon të bombardohet nga forcat izraelite
Autoritetet pushtuese izraelite urdhëruan të hënën në mbrëmje dëbimin e mijëra palestinezëve të zhvendosur nga qyteti Khan Younus në jug të Rripit të Gazës, sipas burimeve lokale.
Ushtria izraelite publikoi një paralajmërim në rrjetin X, duke urdhëruar banorët e blloqeve 47, 106, 108 dhe 109 në perëndim të Khan Younus të zhvendosen menjëherë drejt zonës al-Mawasi – një zonë që më parë është shpallur “zonë humanitare”.
Por ndonëse e cilësuar si “zonë e sigurt”, al-Mawasi ka qenë në mënyrë të përsëritur objektiv i bombardimeve izraelite, duke vënë në rrezik jetët e mijëra familjeve palestineze që kanë kërkuar strehim aty për t’i shpëtuar sulmeve ajrore dhe tokësore.
Katastrofë humanitare në rritje
Që nga 2 marsi, kur Izraeli mbylli të gjitha pikat kufitare me Gazën, situata humanitare është përkeqësuar ndjeshëm. Rreth 1.5 milion nga 2.2 milion banorë janë aktualisht të pastrehë dhe përballen me urinë ekstreme dhe mungesën totale të ndihmës humanitare e mjekësore.
Pas përfundimit të një marrëveshjeje armëpushimi më 18 mars, Izraeli rifilloi agresionin e tij ndaj Gazës me një valë bombardimesh ajrore, duke vrarë qindra palestinezë në të gjithë Rripin.
Sipas burimeve mjekësore, së paku 4,201 njerëz janë vrarë dhe 12,652 janë plagosur që nga rifillimi i ofensivës. Vetëm në 24 orët e fundit, 52 trupa të pajetë dhe 503 të plagosur janë dërguar në spitalet e Gazës – pa përfshirë spitalet e veriut, të cilat nuk janë më funksionale për shkak të sulmeve.
Shifra alarmante dhe zhdukje masive
Që nga fillimi i luftës më 7 tetor 2023, Izraeli ka vrarë të paktën 54,470 palestinezë, shumica gra dhe fëmijë, ndërsa 124,693 të tjerë janë plagosur. Të paktën 10,000 persona rezultojnë të zhdukur, të cilët dyshohet se ndodhen nën rrënojat e banesave të tyre.
Fushata ushtarake ka shkaktuar gjithashtu zhvendosjen masive të gati dy milionë palestinezëve nga të gjitha pjesët e Gazës. Shumica janë detyruar të grumbullohen në qytetin jugor të Rafahut pranë kufirit me Egjiptin – duke krijuar eksodin më të madh palestinez që nga Nakba e vitit 1948. /mesazhi
