Kryeministri japonez Shigeru Ishiba ka deklaruar të mërkurën se Japonia do të angazhohet për të dërguar ndihmë humanitare për popullin palestinez në Rripin e Gazës, që ndodhet nën një bllokadë të ashpër nga Izraeli.
Në një deklaratë nga zyra e Kryeministrit japonez thuhet se Ishiba ka pritur në Tokio Komisionerin e Përgjithshëm të Agjencisë së OKB-së për Ndihmë ndaj Refugjatëve Palestinezë (UNRWA), Philippe Lazzarini.
Ishiba theksoi se “krijimi i një mjedisi që lejon dërgimin e ndihmës është jashtëzakonisht i rëndësishëm” dhe shprehu respektin e tij për punën që UNRWA bën në mbështetje të refugjatëve palestinezë.
Nga ana e tij, Lazzarini shprehu mirënjohjen për përpjekjet e qeverisë japoneze për përmirësimin e situatës humanitare në Gaza.
Të dy palët riafirmuan angazhimin e tyre për bashkëpunim të vazhdueshëm në mbështetje të refugjatëve palestinezë.
Sipas OKB-së, mbyllja e pikave kufitare të Gazës për ndihma humanitare nga Izraeli që nga 2 marsi ka shtyrë 2.4 milionë banorë drejt urisë ekstreme, përmes një politike të urisë së qëllimshme me synim zhvendosjen me forcë të popullsisë. /mesazhi
