Çmimet, të gjithë aty rreken të bëjnë diferencën
Kroacia ka qenë në fokus të mediave të huaja këtë verë për shkak të rritjes së çmimeve në Adriatik, dhe disa portale po paralajmërojnë se rritja e kostove mund të ndikojë në vendimet e turistëve që kanë ardhur në bregdetin kroat për vite me radhë.
Gazeta zvicerane Blick publikoi një artikull të titulluar ‘Shpërthimi i çmimeve në Kroaci po i largon turistët’, duke deklaruar se Kroacia nuk është më ndër destinacionet më të përballueshme të pushimeve që ishte dikur. Sipas tyre, inflacioni i lartë dhe futja e euros kanë rritur më tej çmimet, prandaj disa turistë po fillojnë të kërkojnë destinacione alternative.
Në tekstet që u transmetuan edhe nga disa media gjermane, çeke, polake dhe italiane, thuhet se disa plazhe në Adriatik janë më pak të mbushura këtë sezon sesa në vitet e kaluara, pavarësisht pushimeve verore.
Portali çek Arecenze paralajmëroi se Kroacia ka humbur një nga avantazhet e saj më të mëdha – një raport të mirë çmim-cilësi. Sipas tyre, çmimet në Kroaci janë rritur me rreth 50 përqind në tre vitet e fundit, ndërsa rritja në destinacionet e tjera mesdhetare ishte dukshëm më e ulët.
Kampet, të cilat tradicionalisht janë të njohura në mesin e turistëve gjermanë, bien në sy në veçanti. Sipas të dhënave nga Shoqata Evropiane e Kampingut ACSI, Kroacia është aktualisht ndër destinacionet më të shtrenjta evropiane për kamping.
Media çeke raporton gjithashtu se Kroacia ka tejkaluar disa konkurrentë si Greqia dhe Spanja për sa i përket çmimeve, prandaj turistët po krahasojnë gjithnjë e më shumë atë që mund të marrin për të njëjtat para në vendet e tjera.
Edhe pse Kroacia vazhdon të tërheqë miliona turistë, mediat e huaja paralajmërojnë se suksesi i ardhshëm i turizmit do të varet kryesisht nga ekuilibri midis çmimeve, cilësisë së shërbimit dhe pritjeve të mysafirëve. /tesheshi
