Të synosh atë kundrejt të cilit ke dështuar e ku kundërshtari nuk të fal
Pasi bisedimet SHBA-Iran në Islamabad përfunduan pa një marrëveshje, Presidenti i SHBA-së Donald Trump ndau një tekst në platformën e tij Truth Social duke sugjeruar se ai mund të vendosë një bllokadë detare ndaj Iranit nëse vendi nuk pranon kërkesat e SHBA-së.
Artikulli i titulluar “Karta më e fortë e Trump nëse Irani nuk bindet: një bllokadë detare” përshkruan një sërë opsionesh që Uashingtoni po shqyrton në rast se negociatat dështojnë përfundimisht.
Teksti kujton se Trump ka përdorur më parë një strategji të ngjashme, siç është bllokada detare e Venezuelës, e cila ka dobësuar seriozisht ekonominë e vendit, veçanërisht sektorin e saj të naftës. Një qasje e ngjashme mund të zbatohet tani për Iranin, ekonomia e të cilit është tashmë nën presion të fortë.
Sipas këtij skenari, Shtetet e Bashkuara mund të përpiqen të marrin kontrollin e rrugëve kryesore detare, veçanërisht Ngushticës së Hormuzit, përmes së cilës kalon një pjesë e madhe e naftës botërore. Kjo do të kufizonte më tej eksportet iraniane dhe do të ushtronte presion jo vetëm mbi Teheranin, por edhe mbi vende të tilla si Kina dhe India, të cilat varen nga nafta iraniane.
Marina Amerikane tashmë ka një prani të fortë në rajon. Aeroplanmbajtësja USS Gerald R. Ford, e cila më parë mori pjesë në operacionet e bllokimit, tani është në Gjirin Persik, së bashku me USS Abraham Lincoln dhe anije të tjera ushtarake. Ekspertët besojnë se SHBA-të mund të monitorojnë dhe kontrollojnë relativisht lehtë trafikun përmes Ngushticës së Hormuzit.
Analistët e sigurisë thonë se Marina Amerikane mund të vendosë kontroll të plotë mbi kalimin e anijeve, me mbikëqyrje dhe prani të avancuar në pikat kyçe, të cilat praktikisht do të vendosnin se kush mund të kalojë nëpër këtë rrugë strategjike.
Në të njëjtën kohë, pas 21 orësh negociatash në Pakistan, zëvendëspresidenti i SHBA-së JD Vance u largua nga Islamabadi pa një marrëveshje, duke thënë se Iranit i ishte ofruar “oferta përfundimtare dhe më e mirë”. Çështja kryesore mbetet programi bërthamor i Iranit, ndërsa Uashingtoni kërkon garanci të qarta se Teherani nuk do të zhvillojë armë bërthamore.
Ndërsa armëpushimi i përkohshëm skadon, administrata amerikane thuhet se po shqyrton një numër opsionesh – nga sulme të reja ushtarake deri te një bllokadë ekonomike – nëse Irani refuzon kushtet e ofruara.
Por realiteti i luftës mbi një mujore tregoi një tjetër Iran, si dhe një tjetër SHBA: i pari kockë e fortë, i dyti jo dhe aq i pamposhtur.
Ndërkohë, situata në Ngushticën e Hormuzit mbetet jashtëzakonisht e tensionuar dhe forcat amerikane tashmë po ndërmarrin hapa për të siguruar lundrimin dhe për të parandaluar destabilizimin e mëtejshëm të tregut global të energjisë. /tesheshi
