Kolonët okupues izraelitë kanë rrëmbyer një palestinez 14-vjeçar dhe kanë plagosur pesë të tjerë në sulme të ndara në veri të Bregut Perëndimor të mërkurën vonë, sipas medias zyrtare palestineze, transmeton Anadolu.
Okupuesit kanë rrëmbyer 14-vjeçarin nga qyteti Qabalan dhe e kanë dërguar në vendbanimin Itamar, pa informacione për lirimin e tij, raportoi agjencia palestineze e lajmeve WAFA.
Në incidente të veçanta, katër sulme nga kolonët kanë ndodhur në jug të qytetit Nablus dhe një i pestë në lindje të Tubasit, duke përfshirë sulme fizike, rrëmbime dhe keqtrajtim të banorëve, shtoi WAFA.
Kreu i këshillit të fshatit, Ibrahim Omran, tha se në një incident, një i ri u rrah dhe u plagos nga kolonët mes qytetit Aqraba dhe fshatit Yanun.
Në fshatin Burin, një grua pësoi asfiksi pasi kolonët e sulmuan me sprej djegës gjatë bastisjes së një shtëpie dhe qëlluan me municion të vërtetë për të frikësuar banorët, shtoi ai.
Kolonët gjithashtu rrëmbyen dy të rinj nga Einabus, i dërguan në një zonë pranë një vendbanimi, i rrahën dhe i zhveshën para se t’i lironin, raportoi WAFA.
Në lindje të Tubasit, kolonët sulmuan një palestinez ndërsa ai po punonte në fermën e tij, megjithëse nuk ka detaje për gjendjen e tij.
Sipas Komisionit për Rezistencën ndaj Murit dhe Vendbanimeve, kolonët okupues izraelitë kanë kryer 4.723 sulme në gjithë Bregun Perëndimor të pushtuar gjatë vitit 2025, duke vrarë 14 palestinezë dhe duke zhvendosur 13 komunitete beduine me gjithsej 1.090 persona.
Izraeli ka intensifikuar operacionet në Bregun Perëndimor, përfshirë Kudsin Lindor, që nga nisja e fushatës ushtarake në Rripin e Gazës më 8 tetor 2023. Palestinezët e shohin përshkallëzimin, përfshirë vrasjet, arrestimet, zhvendosjet dhe zgjerimin e vendbanimeve kolone, si një hap drejt aneksimit formal të territorit.
Në një opinion historik në vitin 2024, Gjykata Ndërkombëtare e Drejtësisë e shpalli të paligjshëm pushtimin izraelit të territorit palestinez dhe bëri thirrje për evakuimin e të gjitha vendbanimeve kolone në Bregun Perëndimor dhe Kudsin Lindor.
