Kryeministri i Kosovës, Albin Kurti, ka zhvilluar një bisedë telefonike me këshilltarin e Departamentit Amerikan të Shtetit, Derek Chollet.
Chollet ka uruar për arritjen e marrëveshjes, duke pranuar bisedime të gjata e të vështira.
“Kam pasur bisedë me këshilltarin e Departamentit të Shtetit, Chollet, që më uroi për marrëveshjen e arritur në Ohër, duke pranuar bisedimet e gjata e të vështira. E kam falënderuar për përkrahjen dhe rolin e SHBA-së. Marrëveshja Bazë dhe Aneksi, siç është cekur në tekst dhe në frymë, duhet të ndryshoi tash realitetin në terren”, ka shkruar Kurti në Twitter.
Për telefonatën me Chollet, Kurti ka folur edhe në Kuvend. Duke iu përgjigjur deputetit të PDK-së, Enver Hoxhaj, i cili e quajti dështim atë që është arritur në Ohër, Kurti tha se Chollet e uroi për suksesin.
“Deputeti Hoxhaj tha është dështimi në Ohër, unë në ora 13:00 kisha telefonatë, prandaj u desh të largohem nga seanca, në ora 13:00 kam pasur telefonatë më të dhe ai më thirri për të më uruar për suksesin në Ohër, a ju thatë që është dështim, ju po besoni që Kosova ka dështuar në Ohër, ndërkaq Chollet ma uroi suksesin në Ohër”, ka theksuar Kurti.
