Komisioneri i OKB-së për refugjatët palestinezë, Philippe Lazarini, paralajmëroi se rreth dy milionë palestinezë në Rripin e Gazës po përballen me uri të rëndë. Ai akuzoi Izraelin për përdorimin e ushqimit si armë për të privuar palestinezët nga dinjiteti i tyre.
Lazarini kritikoi mekanizmin e ndihmave të krijuar së fundmi në Gaza, i cili mbështetet nga SHBA dhe Izraeli, duke thënë se ai është një “kurth për vdekjen” dhe nuk përmbush nevojat reale.
Ndërkohë, organizata humanitare “WCK” (World Central Kitchen) njoftoi rifillimin e aktivitetit në Gaza pas 12 javësh pezullim për shkak të bllokadës izraelite. Ajo tha se tashmë kanë hyrë ndihma dhe po gatuajnë rreth 10,000 vakte ushqimi në ditën e parë të punës.
Megjithatë, situata mbetet shumë kritike, ndërsa shumica e palestinezëve vazhdojnë të përballen me mungesë ushqimi dhe ndihmash.
