Policia në Uttarakhand të Indisë, ka regjistruar një rast pas një takimi të liderëve hindu, të cilët bënë thirrje për dhunë kundër myslimanëve, përcjell Koha.net.
Videot nga takimi që tregonin fjalime provokuese nga udhëheqësit fetarë hindu u bënë virale në fillim të kësaj jave, duke shkaktuar zemërim.
Ngjarja ndodhi në qytetin Haridwar midis 17 dhe 19 dhjetor. Por policia tha se nuk kishte hapur një rast deri të enjten sepse nuk kishte ankesa zyrtare para kësaj.
Nuk ka pasur ende të arrestuar, dhe rasti i policisë përmend vetëm një burrë me emër – Waseem Rizvi, një mysliman që thotë se është konvertuar në hindu dhe tani njihet si Jitendra Narayan Tyagi. Policia tha se ishte regjistruar një rast kundër Tyagit dhe “të tjerëve” të paidentifikuar nën akuzat e “promovimit të urrejtjes midis grupeve fetare”. Përdoruesit e mediave sociale, megjithatë, kanë identifikuar shumë nga folësit në video, të cilët janë udhëheqës të rëndësishëm fetarë që shihen shpesh në shoqërinë e ministrave dhe anëtarëve nga Partia Bharatiya Janata (BJP) e kryeministrit Narendra Modi.
Aktivistët thonë se frekuenca e krimeve të urrejtjes kundër myslimanëve dhe pakicave të tjera është rritur që nga viti 2014, kur BJP erdhi për herë të parë në pushtet. Videot e gjuhës së urrejtjes ose dhunës kundër myslimanëve bëhen rregullisht virale në Indi
Kritikët pretendojnë se kjo është për shkak të mbështetjes – të hapur dhe të heshtur – që autorët marrin nga krerët e lartë të partisë në pushtet, shkruan BBC.
Një nga organizatorët e ngjarjes në Haridwar, Prabodhanand Giri, u pa duke kërkuar nga ushtria e Indisë, politikanët dhe hindusët të bënin atë që u bë në Birmani – duke iu referuar dhunës vdekjeprurëse kundër myslimanëve Rohingya që çoi në eksodin e tyre nga vendi.
Në një video, një gazetar që drejton një kanal televiziv të krahut të djathtë mund të shihet duke i dhënë një betim një grupi njerëzish që “të vdesin dhe të vrasin” për ta bërë Indinë një komb hindu. /koha
