Bashkimi Evropian është i bindur se Jordania ka nevojë për mbështetje ekonomike, tha sot shefja e Politikës së Jashtme të BE-së, Federica Mogherini, raporton Anadolu Agency (AA).
Duke folur në një konferencë shtypi me ministrin e Jashtëm jordanez, Ayman al-Safadi në Amman, Mogherini, siguroi Jordaninë për mbështetjen e vazhdueshme ekonomike për mbretërinë.
Ajo tha se BE gjatë viteve të fundit ka ofruar mbështetje ekonomike dhe financiare për Jordaninë dhe blloku do të vazhdojë të njëjtin nivel mbështetjeje për vendin.
Mogherini mbërriti në Amman të shtunën dhe zhvilloi takim me mbretin Abdullah II për të diskutuar zhvillimet në vend.
Vizita vjen në mesin e protestave në Jordani që kur Qeveria muajin e kaluar miratoi një projekt-ligj të diskutueshëm të tatimit mbi të ardhurat.
Protestat detyruan kryeministrin Hani al-Mulki të japë dorëheqje, ndërsa mbreti jordanez emëroi ministrin e Arsimit, Omar al-Razzaz, për të kryesuar qeverinë e re.
Al-Safadi, nga ana e tij, tha se bisedimet me shefen e Politikës së Jashtme të BE-së ishin “mundësi për t’u angazhuar në dialog çështjet dypalëshe dhe rajonale”.
“Bashkëpunimi me BE-në na ka ndihmuar në procesin tonë të zhvillimit,” tha ai.
Amman kohët e fundit ka rritur çmimet e subvencionuara të energjisë elektrike për herë të pestë këtë vit, duke çuar në pakënaqësi të mëtejshme popullore. Gjithashtu njoftoi rritjen e çmimeve të karburantit të subvencionuar përpara se të ndryshonte shpejt lëvizjen pas një reagimi të ashpër popullor.
Sipas të dhënave zyrtare, buxheti i Jordanisë për këtë vit vuan nga deficiti financiar prej 1.753 miliardë dollarë.
Arabia Saudite planifikon të organizojë një samit kuarteti, ku do të marrin pjesë Kuvajti, Emiratet e Bashkuara Arabe dhe Jordania për të diskutuar krizën e vazhdueshme ekonomike në Jordani.
