Edhe pse mërgimtarët veçse kanë filluar të vijnë në Kosovë për pushimet verore, në pikat kufitare hyrëse të vendit nuk ka ende kolona.
Në të dhënat e fundit nga Ministria e Punëve të Brendshme njoftohet se në hyrje të Dheut të Bardhë ka pritje vetëm deri në pesë minuta, e njëjtë situata është edhe në Merdare.
Dy pikat kufitare janë në gjendje të njëjtë sa i përket kolonave përgjatë këtyre ditëve.
Duhet përkujtuar që nga muaji korrik pritet ardhje edhe më e madhe e mërgimtarëve.
Madje një gjë të tillë ditë më parë për lajmi.net e kanë deklaruar edhe nga Aeroporti i Prishtinës si dhe nga pikat kufitare tokësore.
Për shkak se viti i kaluar ishte në një situatë të jashtëzakonshme pandemike shumë prej mërgimtarëve nuk arritën që të vinin fare, kësisoj ky vit pritet të kompensojë mungesën e tyre me ardhje edhe më të mëdha.
Ditë më parë nga Qeveria e Kosovës u morë vendim që në kuadër të buxhetit të Kosovës të paguhen edhe polisat kufitare për të gjithë mërgimtarët që vijnë përmes rrugëve tokësore.
