Organizata Botërore e Shëndetësisë njoftoi se nëntë infermierë janë vrarë dhe shtatë të tjerë janë plagosur si pasojë e pesë sulmeve të ndara ndaj shërbimeve shëndetësore në jug të Libanit.
Drejtori i përgjithshëm i OBSH-së, Tedros Adhanom Ghebreyesus, bëri të ditur përmes rrjeteve sociale se incidentet e fundit kanë goditur ekipe mjekësore në pesë fshatra të ndryshme.
Ai theksoi se sulmet e përsëritura kanë dëmtuar rëndë funksionimin e sistemit shëndetësor në jug të vendit. Sipas tij, katër spitale dhe 51 qendra të kujdesit parësor shëndetësor janë mbyllur, ndërsa disa të tjera funksionojnë me kapacitet të reduktuar.
OBSH bëri thirrje për mbrojtjen e personelit dhe infrastrukturës shëndetësore në zonat e konfliktit. /mesazhi
