Organizata e Kombeve të Bashkuara (OKB) bëri thirrje për hapjen urgjente të porteve në rajonin e Odesas, në mënyrë që produktet ushqimore të prodhuara në Ukrainë të mund të transportohen lirisht në pjesën tjetër të botës.
Në një deklaratë me shkrim nga Programi Botëror i Ushqimit i Kombeve të Bashkuara (WFP), shkruhet: “Përpara se kriza globale e urisë të dalë jashtë kontrollit, WFP po bën sot thirrje për rihapjen e porteve në rajonin e Odesas të Ukrainës, në mënyrë që ushqimi i prodhuar në vendin e shkatërruar nga lufta (që filloi më 24 shkurt midis Rusisë dhe Ukrainës) të mund të jetë i lirshëm për t’u transportuar në pjesën tjetër të botës.”
David Beasley, Drejtori Ekzekutiv i WFP, në deklaratë tha: “Për momentin, hambarët e grurit të Ukrainës janë plot. Në të njëjtën kohë, 44 milionë njerëz në mbarë botën janë të uritur. Ne duhet t’i hapim këto porte në mënyrë që ushqimi të hyjë dhe të dalë nga Ukraina. Bota e kërkon këtë sepse qindra miliona njerëz në mbarë botën varen nga këto burime. Koha po mbaron dhe mosveprimi do të bëjë që kostoja të jetë më e lartë se sa pritet prej kushdo.”
Në deklaratën e WFP, u vu re se portet janë të bllokuara për shkak të luftës, dhe për këtë arsye miliona tonë metrikë drithë janë duke pritur në magazinat në Odesa dhe në portet e tjera të Ukrainës në Detin e Zi.
Duke vënë në dukje se nëse portet e Ukrainës nuk rihapen, fermerët ukrainas nuk do të kenë ku t’i ruajnë produktet e tyre në korrjen korrik-gusht, deklarata tha se drithërat që presin në hambare gjatë luftës kundër krizës globale të urisë do të shpërdorohen.
Duke thënë se 276 milionë njerëz në mbarë botën po përballen me urinë akute, WFP theksoi se ky numër pritet të rritet me 47 milionë nëse konflikti në Ukrainë vazhdon.
WFP vuri në dukje se ushqimi i prodhuar nga Ukraina para luftës ishte i mjaftueshëm për të ushqyer 400 milionë njerëz dhe ai eksportohej përmes porteve në Detin e Zi. /trt
