OKB-ja ka nisur një apel humanitar prej 1 miliard dollarësh për viktimat në Turqi të prekur nga tërmetet që ndodhën më 6 shkurt, transmeton Anadolu.
“Sot Kombet e Bashkuara po nisin një thirrje humanitare prej 1 miliard dollarësh për popullin e Turqisë që po vuan nga tërmetet më shkatërruese që kanë goditur vendin në një shekull”, ka thënë në një deklaratë Sekretari i Përgjithshëm Antonio Guterres.
“Mjetet – që mbulojnë një periudhë tremujore – do të ndihmojnë 5,2 milionë njerëz dhe do t’u mundësojnë organizatave të ndihmës të rritin me shpejtësi mbështetjen jetike për përpjekjet e ndihmës të udhëhequra nga qeveria në një numër fushash, duke përfshirë sigurinë ushqimore, mbrojtjen, arsimin, ujin dhe strehimin”, thuhet në deklaratë.
“Turqia është shtëpi e numrit më të madh të refugjatëve në botë dhe ka treguar bujari të madhe për fqinjët e saj sirianë për vite me radhë”, ka theksuar Guterres.
“Tani është koha që bota të mbështesë popullin e Turqisë – ashtu siç kanë qëndruar në solidaritet me të tjerët që kërkojnë ndihmë. Nevojat janë të mëdha, njerëzit po vuajnë dhe nuk ka kohë për të humbur”, ka shtuar ai.
Guterres gjithashtu i ka kërkuar “komunitetit ndërkombëtar të rrisë dhe të financojë plotësisht këtë përpjekje kritike në përgjigje të një prej fatkeqësive më të mëdha natyrore të kohës sonë”.
