Presidentja e Kosovës, Vjosa Osmani, ka mbledhur të premten strukturat e sigurisë së Kosovë, pas sulmeve ndaj Policisë në tri ditët e fundit në veri, ka mësuar KOHA nga burimet e saj.
Osmani po diskuton më këto struktura për situatën e sigurisë dhe hapat e mëtutjeshëm.
Ministria e Punëve të Brendshme dhe Policia e Kosovës kanë bërë të ditur përmes një konference për media të premten se Policia e Kosovës është sulmuar katër herë në tri ditët e fundit në pjesën veriore.
Ministri i MPB-së, Xhelal Sveçla, ka bërë të ditur se dy vetura të Policisë së Kosovës të cilat po bartnin zyrtarë policorë për në pikat kufitare në veri, janë sulmuar vetëm në mëngjesin e së premtes.
