Ballina Lajmet Kosovë Osmani: Plani i BE-së, hap i rëndësishëm drejt integrimit

Osmani: Plani i BE-së, hap i rëndësishëm drejt integrimit

Presidentja e Kosovës, Vjosa Osmani, ka deklaruar se me presidenten e Komisionit Evropian, Ursula von der Leyen, diskutuan mbi planin e ri të rritjes së Ballkanit Perëndimor, nëpërmjet të cilit sipas Osmanit, synohet integrimi i Kosovës në tregun evropian.

Ajo ka deklaruar të hënën para mediave se ndër të tjera, plani parasheh mbështetjen e Bashkimit Evropian në rritjen e asistencës financiare “për reforma që duhen të merren në procesin integrues”.

“Takimi ynë i sotëm u fokusua te plani i ri i rritjes së Ballkanit Perëndimor të cilën e prezantoi presidentja von der Leyen. Krahas kësaj, kisha mundësinë të informoj presidenten për zhvillimet e fundit në vend dhe angazhimin e çdoditshëm të institucioneve tona për të integruar Kosovën në BE. Plani gjithëpërfshirës i bazuar në katër shtylla shënon hap të rëndësishëm drejt integrimit në tregun e përbashkët evropian. Ndër të tjera, plani parasheh mbështetjen e BE-së nëpërmjet rritjes së asistencës financiare për reforma që duhen të ndërmerren në procesin integrues”, ka thënë Osmani.

Sipas presidentes Osmani, Kosova është e gatshme të bëjë hapin e radhës drejt së ardhmes evropiane “për të cilën po punon çdo ditë”.

Ajo ka theksuar se e ardhmja në Bashkimin Evropian dhe në NATO s’ështe qëllim, por motiv themelor “që formëson veprimet e institucioneve”.

Tutje, Osmani i ka bërë thirrje Serbisë që t’i ekstradojë serbët e përfshirë në sulmin e 24 shtatorit, duke shtuar se Kosova do të garantojë drejtësi.

“Duhet të jemi të bashkuar për të refuzuar dhunën si mjet për arritjen e qëllimeve keqdashëse që minojnë vlerat….Të punojmë me partnerët ndërkombëtarë për të siguruar sundim të ligjit. Grupi terrorist i përfshirë në sulmet e 24 shtatorit të përballet me drejtësinë në Kosovë”, ka shtuar ajo.