Janë marrë masa me vendosjen e kontejnerëve në hyrjet dhe daljet e ‘zonës së kuqe’ në të cilën ndodhen ndërtesa e parlamentit, ministritë, përfaqësitë diplomatike dhe Komisioni Zgjedhor
Në kryeqytetin e Pakistanit, Islamabad, janë rritur masat e sigurisë pas vendimit të ish-kryeministrit Imran Khan për të protestuar kundër Komisionit Zgjedhor, transmeton Anadolu Agency (AA).
Sipas lajmeve në shtypin kombëtar, janë marrë masa me vendosjen e kontejnerëve në hyrjet dhe daljet e ‘zonës së kuqe’ në të cilën ndodhen ndërtesa e parlamentit, ministritë, përfaqësitë diplomatike dhe Komisioni Zgjedhor.
Teksa hyrjet dhe daljet në ‘zonën e kuqe’ kryhen nga një vend i vetëm, mësohet se është ndaluar hyrja e civilëve në zonë.
Zyrtarët kanë bërë të ditur se përreth ‘zonës së kuqe’ janë mobilizuar 2 mijë forca të sigurisë.
Ndërsa ish-kryeministri Khan në një deklaratë në Twitter njoftoi se protesta do të mbahet në zona të ndryshme të Islamabadit.
Komisioni Zgjedhor i Pakistanit, në vendimin që mori më 2 gusht vendosi se Partia Lëvizja për Drejtësi e Pakistanit (PTI) e udhëhequr nga ish-kryeministri Khan ka marrë fonde të ndaluara nga burime të huaja në kundërshtim me kushtetutën dhe rregullat zgjedhore.
Në vendimin e tij, Komisioni Zgjedhor tha se PTI ka marrë fonde të ndaluara nga 34 individë dhe 351 kompani nga SHBA-ja, Britania e Madhe, Australia, Emiratet e Bashkuara Arabe (EBA) dhe vende të tjera.
Ndërkohë, ish-kryeministri Khan mori vendim për të protestuar duke pretenduar se Komisioni Zgjedhor “është paragjykues ndaj PTI dhe punon si një partner i qeverisë së koalicionit”. /aa
