Ka përfunduar takimi i grupit punues të Këshillit të Bashkimit Evropian, ku është diskutuar për liberalizimin e vizave për Kosovën.
REL raporton se Presidenca çeke ka thënë përmes një deklarate se në mënyrë që të ecet përpara në këtë temë, “është e domosdoshme që të qartësohen disa çështje, dhe të vazhdohet me diskutimet”.
Ndërsa takimi i radhës i këtij grupi pritet të jetë në nëntor të këtij viti.
Në lidhje me këtë, në një deklaratë të lëshuar nga Presidenca çeke, thuhet se në takimin e sotëm, Komisioni Evropian ka prezantuar raportin i cili rikonfirmon që Kosova vazhdon të përmbush kriteret për liberalizimin e vizave.
“Më 13 tetor, Grupi Punues për Vizat i Këshillit të BE-së e ka mbajtur diskutimin e parë për liberalizimin e vizave për Kosovën nën Presidencën Çeke. Komisioni Evropian ka prezantuar raportin e përditësuar teknik për këtë temë i cili rikonfirmon që Kosova vazhdon të përmbushë kriteret për liberalizimin e vizave”, thuhet në deklaratën e tyre.
Tutje shtohet edhe se, grupi punues në përgjithësi ka mbështetur procesin e liberalizimit të vizave dhe se diskutimet duhet të vazhdojnë në mënyrë që të ketë progres në këtë çështje.
“Grupi Punues e ka mirëpritur rihapjen e diskutimeve mbi këtë temë dhe në përgjithësi e ka mbështetur procesin e liberalizimit të vizave. Në mënyrë që të ketë progres në këtë çështje do të jetë e nevojshme që të sqarohen një sërë temash të ndërlidhura dhe të vazhdohet diskutimi”, është thënë tutje në deklaratën e presidencës çeke.
Përndryshe, më herët është raportuar se liberalizimi i vizave për Kosovën është kushtëzuar nga ana e Francës me funksionalizimin e sistemit për siguri në Evropë, ETIAS.
